Pulis nga duty jailer sa Estancia Police Station, nagbitay patay

Estancia, Iloilo — Patay ang 48 anyos nga pulis nga duty jailer sa estancia police station matapos nagbitay sang kaugalingon kaina sang aga.  Nasapwan sang duty investigator ang pulis nga nagabitay sa sulod sang female detention cell sang police station.   Suno kay Chief Inspector Jonah Galicha, hepe sang Estancia Police Station, nakita pa sang mga preso ang pulis nga may dala nga kable sang koryente sang nagsulod sa karsel sang mga babaye.  Posible suno kay Galicha nga problema sa pamilya kag trabaho ang rason sang paghikog sang pulis.  Gintumod sini ang ginapangatubang nga kaso sang pulis sa Regional Internal Affairs Service ukon RIAS matapos nadakpan nga nagabulang, pagkuwestyun sa iya ginprenda nga issued firearm kag ang pagbulagay nila sang iya asawa bangud sa sugal. (JoMaque)