Voters registration para sa Barangay kag SK elections sa masunod nga tuig, liwat nga ginbuksan sang City Comelec       

Iloilo City–Liwat nga ginbuksan sang City Comelec ang ila opisina para sa voters registration sa Barangay kag Sangguniang Kabataan elections sa masunod nga tuig.

Ginkumpirmar ni Mr. Jonathan Sayno, Election Assistant 2 sang City Comelec, nga nagsugod subong nga adlaw ang registration kag magatapos sa Nobyembre 30. Gin-athag ni Sayno nga gina-cater lang nila ang pagrehistro sang mga bag-o nga botante, application sa correction of entry kon may sala sa record kag reactivation sang mga nakakas na sa voters list bangud wala nakaboto sa duha ka sunod-sunod nga election. Wala naman ginabaton ang pagsaylo sang registration record.

Sa mga luyag magboto sa SK elections, ginabaton sang Comelec ang pagparehistro sang mga pamatan-on nga maga-edad 15-anyos paga-abot sang Mayo 14, 2018. Kinahanglan lang suno kay Sayno nga magdala sang photocopy sang birth certificate.

Bukas ang City Comelec halin Lunes tubtob Sabado, alas-8 sa aga tubtob alas-5 sa hapon. (AGB)