Iloilo City–Matambong sa presentasyon sang Panay Electric Company (PECO) sa City Council ang mga nagareklamo nga konsumedor buwas.

Suno kay Father Marco Sulayao sang Iglesia Filipina Independiente, gusto niya nga pamatian ang paathag sang PECO sa mga reklamo sang mga konsumedor ilabe na sa overbilling. Nakibot si Sulayao nga ginpadal-an siya sang PECO sang notice nga utdan sang kontador kun indi mabayaran ang P108, 000 niya nga bill sang Oktubre. Wala siya nagpasugot sa tanyag sang PECO nga bayaran sang amat-amat ang bill gani naglab-ot ini sa P108, 000 halin sa P79, 000 nga billing sang Pebrero subong nga tuig.

Sa bahin naman ni Mr. Edgar Aragon sang Bo. Obrero, Lapuz, ginhambalan siya sang PECO nga magbayad lang sang current bill matapos natukiban nga guba ang iya kuntador gani indi insakto ang reading. Apang tubtub subong, indi maathag kun pabayaran pa sa iya ang masobra P112, 000 nga ginpahayag overbilling nga resulta sang guba nga kuntador.

Wala naman sang plano si Mr. Joselito Plana sang Mandurriao nga bayaran ang iya nagalalapaw nga billing tubtub indi mapaathag sang PECO ang sala nga reading sang ila kuntador. Nag-umpisa ang pagtimbook sang balayran ni Plana sang Hunyo subong nga tuig matapos gin-ilisan ang iya nag-overheat nga kuntador kag wala nakapaguwa sang reading ang PECO sang Mayo 8. (AGB)

 

 

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply