Councilor Joshua Alim, nakapresentar sa House Committee on Legislative Franchises sa hagna may kaangtanan sa renewal sang franchise sang PECO

Nakapresentar si Councilor Joshua Alim sa House Committee on Legislative Franchises nga nagadeliberate sang hagna nga gin-author ni Cong. Xavier Jesus Romualdo angut sa renewal sang franchise sang Panay Electric Company kaina sang aga.

Pero nasermunan pa ang konsehal ni Cong. Romualdo bangud sa ginpost ni Alim nga litrato sang kongresista kaupod kay former Senator Mar Roxas sang campaign period. Ginpa-athag ni Alim nga wala sang malisya ang iya post nga nagatumod kay Romualdo nga amo ang sponsor sang House Bill 6023 para marenew ang PECO franchise. Nagsorry na lang si Alim kay Romualdo kag nagpromisa nga i-delete ang post.

Pero ginkalipay ni Alim nga nahatagan siya sang tsansa nga makapresentar sang power point sang nagahilay nga mga poste sang PECO, nagagumon kag nagawilwig nga kable sang kuryente sa poste kag ang mga reaksyon sang netizens lakip na ang reklamo sa serbisyo sang PECO.

Ginpasugtan nga makahambal si Alim sa public hearing matapos nag-apelar si Dr. Pacita Gonzalez kay Committee Chairman Cong. Franz Alvarez. (AGB)