Driver sang habal-habal sa Calinog, gintiro patay; retirado nga pulis, gintudlo mastermind sa krimen

Calinog, Iloilo–Patay ang 21-anyos nga driver sang habal-habal matapos gintiro sa Barangay Cabugao, Calinog kahapon sang hapon.

Ginkilala ang napatay kay Mark Rey Nalaunan sang Barangay Cahigon, Calinog nga may pilas sa likod, dughan, butkon kag guya. Base sa imbestigasyon ni PO2 Vincent Gascon sang Calinog Police Station, pauli na ang biktima sang ginbanggaan sang gunman. Ginpapanaug sang suspek ang manghud ni Nalaunan kag ang classmate sang manghud nga naga-angkas sa motorsiklo antes gintiro ang biktima. Ginsakyan pa sang suspek ang motorsiklo sang biktima sa pagpalagyo.

Love triangle suno kay PO2 Gascon ang ginasunod nila nga motibo kag gintudlo nga mastermind si Retired Police Officer Avelino Chiva, 58-anyos, balo sang Barangay Alibunan, Calinog. Base sa panaysayon sang iloy sang biktima, nagkadto sa ila ang retired police officer sang Oktubre 17 kag ginhambalan nga ibalik sang biktima ang iya asawa. Suno naman sang manghud sang biktima, nabatian niya ang gunman nga naghambal sa iya magulang nga ginapasilabtan sini ang asawa sang iban.

Kaso nga murder ang ipasaka sa retirado nga pulis kag isa ka John Doe. Ginpahayag nga indi na makita sa ila lugar ang retired police kag iya live-in partner. (AGB)