Bangkay sang Ilongga nga ginpahayag naglumpat sa barko sa Romblon, nakita sa Caluya, Antique

Narecover ang bangkay sang babaye nga ginpahayag naglumpat halin sa barko sang MV Starlite sang Nobyembre 20.

Ginkumpirmar ni Lieutenant Commander Ramil Palabrica sang Coast Guard Iloilo Station nga nakita ang bangkay ni Rachel Pagdato, 33 anyos sang Hacienda Conchita, San Dionisio, sa Barangay Sibato, Caluya, Antique. Nakilala ini sang iya himata paagi sa iya bayo. Kaupod ni Pagdato sa barko ang iya bata nga naga-edad sang duha ka tuig kag tunga nga ginbilin sang mga crew sang barko sa Caticlan kag ginkuha na sang pamilya sang babaye.

Ginahulat na lang ang pamilya ni Pagdato nga magpadulong sa Caluya agud kuhaon ang iya bangkay.

Sa pagpangusisa sang Coast Guard, na-istorya lang ni Pagdato ang iya bana sa cellphone antes siya naglumpat malapit sa Carabao Island sa Romblon. Gina-imbestigaran kon may foul play sa natabu. (AGB)