PRO 6, nagahulat sang mandu sa liwat nga pag-aresto kay NDFP consultant Maria Concepcion Araneta-Bocala

Iloilo City–Ginahulat sang Police Regional Office 6 ang mandu halin sa korte may kaangtanan sa liwat nga pag-aresto kay Maria Concepcion “Concha” Araneta-Bocala.

Kasunod ini sang pagdeklarar ni Presidente Rodrigo Duterte nga terorista ang CPP-NPA kag mandu nga liwat pang-arestuhon ang mga political prisoners nga ginpangbuy-an sadto agud magpasakop sa peace talks sang gobyerno kay CPP-NPA-NDFP sa The Netherlands. Suno kay PRO 6 Spokesman PSUPT Gilbert Gorero, isa lang si Bocala sa ginhilway nga political prisoner sa Western Visayas.

Madamo ini sang pending nga kaso pero sang ginpa-upod siya sa peace talks, gin-untat man sang korte ang hearing sa iya mga kaso. Wala sang pending nga arrest warrant si Bocala suno kay Gorero pero bangud may mga kaso pa nga gina-atubang, ginahulat nila ang mandu sang korte.

Si Bocala ang spokesperson sang CPP Regional Committee sa Panay kag consultant sang National Democratic Front of the Philippines ukon NDFP. Gindakop siya sang Agosto 1, 2015 kag ginpasakaan sang kaso nga illegal possession of firearms and explosives. (AGB)