Pila ka establisemento, naglapas sa Executive Order ni Mayor Joe Espinosa nga nagapasirado sang mga nagaserbe sang ilimnon pag-abot sang alas-2 sa kaagahon

Iloilo City–May mga naglapas sa Executive Order Number 146 nga ginpaguwa ni Mayor Joe Espinosa kahapon sa diin ginamanduan nga magsirado ang tanan nga mga bars, resto bars, disco bars, night clubs ukon kasubong nga mga establishmento sugod las dos sang kaagahun tubtob alas-8 sa aga.

Suno kay Public Safety and Transportation Management Office Jead Jeck Conlu, kalabanan sa mga naglapas ang nahamtang sa Smallville Complex sa Mandurriao. 104 ka mga negosyo sa Smallville Complex kag City Proper area ang ginkadtuan sang mga tinawo ni Conlu kagab-i kag ginpabalo sa EO. Katunga diri ang ginbalikan nila agud gincheck las-dos kaina sang kaagahun kag katunga gid suno kay Conlu ang naglapas sa EO kag ginrason nila nga naga-adjust pa sila sa mandu.

Ginlista ni Conlu ang naglapas nga mga commercial establishments kag naghimo man sang report nga ginpasa naman kay Mayor Eespinosa kag sa Business Processing and Licensing Office. (AGB)