Pito ka negosyante, ginhatagan sang clearance sang Bureau of Protection sa pagbaligya sang mga palupok sa syudad

Iloilo City–May clearance na halin sa Bureau of Fire Protection (BFP) Iloilo City ang pito ka negosyante agud magbaligya sang mga palupok subong nga New Year’s celebration.

Ginkumpirmar ni Iloilo City Fire Marshal Fire Chief Inspector Bartolome Biliran nga ginhatagan sang Fire Safety Inspection Certificate ang mga negosyante agud masiguro nga magasunod sila sa standard sang BFP. Tuyo man sini nga masiguro nga wala sang disgrasya nga matabu sa pagsugata sang bag-ong tuig.

Ginhatagan sang clearance ang Iloilo Society Commercial, Inc.; Pick-up Shop Pyrotechnic Products; Scorpion Fireworks, Inc.; Custodio Fireworks; Sentak Marketing; Tagbak Pioneer, Incorporated kag si Mr. Liberato Abanilla.

Ginatugyan ni Biliran sa local government unit ang pagregulate sa mga negosyante sa sistema sang pagbaligya kag kon diin sila pwede makabaligya. (AGB)