Iloilo City — Ginakabig ni Mayor Joe Espinosa nga invalid ang posisyon sang Board of Directors sang Metro Iloilo Water District epektibu Disyembre 14 sang ginpadala niya ang cease and desist notice sa water district.   Suno kay Espinosa, bakante na ang mga posisyon sang MIWD Board kasunod sang ruling sang Supreme Court nga nagdeklarar nga unconstitutional ang laye sa pag-appoint sa mga miembro sang present board sang water districts sa pungsod.  Ginpahayag ni Espinosa nga tuyo sang iya ginpadala nga cease and desist notice nga pa-andaman ang Board nga untatan ang paghimo sang anuman nga desisyon ukon transaksyon sa MIWD ilabe pa kon naga-involve sang interest sang publiko.  Ang current MIWD board, gin-appoint ni Governor Arthur Defensor.

Opinion sang City Legal Office

Invalid ang pag-appoint sa current nga mga miembro sang Metro Iloilo Water District Board.  Pagpati ini sang City Government suno kay City Legal Officer Lorna Laurea. Kasunod ini sa pagdeklarar sang Supreme Court nga unconstitutional ang laye nga nag-appoint sang subong nga board sang water districts bangud ginabalewala ang principle sang local autonomy.

Ang desisyon sang Korte Suprema amo ang ginbasehan ni Mayor Joe Espinosa sa pagpadala sang cease and desist notice sa MIWD Board sang Disyembre 14 nga untatan ang paghimo sang mga desisyon nga naga-apekto sa interest sang publiko. Tuyo ni Espinosa nga mag-appoint sang bag-o nga MIWD Board bangud sa iya pagpati nga terminated na ang posisyon sang current board.

Sabat sang MIWD

Opinion lang ni Mayor Joe Espinosa ang cease and desist notice nga iya ginpadala sa Metro Iloilo Water District kag MIWD Board of Directors.  Pahayag ini ni MIWD legal officer Roy Villa sa pa-andam ni Espinosa nga dapat untaton sang MIWD Board ang paghimo sang mga desisyon bangud gindeklarar sang Korte Suprema nga unconstitutional ang probisyon sang laye nga naga-appoint sa ila base sa kaso nga ginpasaka sang Metro Cebu Watert District.  Suno kay Villa, ginarespeto nila ang opinion ni Mayor Espinosa pero wala nagakahulugan nga ginakompormehan nila.  Ginpahayag ni Villa nga indi pwede mabayaan sang Board ang ila posisyon bangud balido ang pag-appoint sa ila sang proper authority nga amo si Governor Arthur Defensor. Kinamatarung naman suno kay Villa ni Espinosa nga magkadto sa korte kon indi nila pagsundon ang cease and desist notice agud ma-athagan ang tanan sa isyu. (JoMaque)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply