(UPDATE) Mga negosyante sa Smallville Complex, nagplastar sang ila sentimento sa Executive Order 146 ni Mayor Joe Espinosa

Iloilo City–Nagpakigkita kay Mayor Joe Espinosa kag sa Public Safety and Transportation Management Office ukon PSTMO ang mga negosyante sa Smallville Complex sa Mandurriao agud makighinun-anon may kaangtanan sa Executive Order number 146 nga nagapasirado sa mga establishmento sa siyudad halin las 2 sa kaagahon.

Suno kay PSTMO Head Jeck Conlu, nagkadto sa opisina ni Espinosa ang mga negosyante sang Biernes kag ginplastar ang ila mga sentimiento pero nanindugan suno kay Conlu ang alkalde nga ipatuman gid ang iya mandu Ginpanugyanan ang mga negosyante nga ibutang sa papel ang ila mga sentimiento kag ipadala sa city hall.

Natalana man nga magsumiter si Conlu sang observation report sa alkalde kun nangin epektibo ang mandu sang mayor.

Pananglitan makita nga may daku nga improvement bangud sa pagpasirado sang mga establishmento sa las-2 sa kaagahon, padayon ini nga ipatuman. (AGB)