Driver sang salakyan nga nag-hit and run sa 5 ka magpamilya sa Brgy. Quintin Salas, Jaro, nagsurrender

Iloilo City — Nagsurrender ang driver sang toyota hi-lux nga nag-hit and run sa 5 ka magpamilya sa Quintin Salas, Jaro sang lunes sang kaagahon.  Ginturn-over  ni Tacas Jaro punong barangay Joseph Porral sa Jaro police si Franz Magbanua, 27 anyos sang Tabuc Suba, Jaro kag nurse sa Western Visayas Medical Center.  Suno kay PO3 Jeffrey Janay, traffic investigator sa Jaro Police Station, halin sa christmas party sa Pavia si Magbanua kag may gindul-ong nga abyan sa Barangay Tacas. Gin-athag ni Magbanua sa police nga indi siya hubog apang gin-ako nga napiyungan kag nabatyagan pa niya nga may nabungguan siya. Bangud sa kakulba, nagdiretso ini papuli tubtub nagdesisyon nga magsurrender paagi kay Kapitan Porral. Nagpasalig si magbanua nga abagahon ang gasto sa pagpabulong sang mga biktima.  Estable na ang kondisyon sang 4 sa lima samtang ipaidalum naman sa operasyon ang menor de edad nga biktima. (JoMaque)