Tatlo, patay sa duha ka separado nga aksidente sang motorsiklo sa syudad kag probinsya sang Iloilo

Iloilo–Duha ang patay sa pagbungguanay sang duha ka motorsiklo sa Barangay Tingui-an, Balasan kagab-i. Ginkilala ang mga napatay kanday Expedito Ddalesme, 19-anyos, kag Johnny Bantiling, 53-anyos, lunsay residente sang amo nga barangay.

Sa imbestigasyon sang Balasan police, pakadtu sa simbahan ang motorsiklo nga ginamaneho ni Dalesme angkas ang iya utod nga si Sendy Dalesme kag duha sini ka bata nga naga-edad sang 9 kag 5 ka tuig sang nakabunggo sa motorsiklo nga ginamaneho ni Bantiling. Ginpahayag nga wala sang headlight ang motorsiklo ni Bantiling. Gindala pa sa ospital sanday Dalesme kag Bantiling apang gindeklarar nga napatay bangud sang pilas sa ulo.

Ginrefer sa ospital sa syudad sang Iloilo ang 9 ka tuig nga bata nga angkas ni Dalesme.

Samtang, isa man ang patay kag isa ang pilason sang nagtumpilak ang motorsiklo sa Barangay Airport, Mandurriao kaina sang kaagahon. Gindala pa sa ospital si Wilsonjon Fan, 20-anyos sang Pavia apang wala gid natabangan bangud sa patal nga pilas sa ulo. Estable naman ang backrider sini nga si Merwin Lanzarote, 21-anyos sang Dungon B, Jaro.

Pakadto kontani sa Molo ang duha para mangaldo sang ma-aksidente. Suno sa testigo wala makit-an ni Fan ang gutter sa R. Mapa Street bangud sa madulom ang lugar. (AGB)