Nag-isyu ang Ombudsman sang ikaduha nga dismissal order batuk kay former Mayor Jed Patrick Mabilog.

Ginmandu ni Ombudsman Conchita Carpio Morales ang dismissal ni Mabilog matapos napamatud-an nga guilty sa Grave Misconduct, Serious Dishonesty kag Conduct Prejudicial to the Best Interest of the Service. Gindisqualify si Mabilog nga mag-uyat sang public office, ginkanselar ang iya eligibility, gin-forfeit ang retirement benefits kag gindumilian nga magkuha sang civil service examinations.

Base sa desisyon, Abril 8, 2014 sang gin-aprubahan sang City Council ang Regulation Ordinance nga naga-incorporate sa pagamit sang wheel towing clamp nga kabahin sang Towing Ordinance. Pebrero 17, 2015 sang gin-aprubahan sang SP ang resolution nga naga-otorisar kay Mabilog nga magpirma sang Memorandum of Agreement sa tunga sang city government kag 3L Towing Services para ma-implementar ang Clamping Ordinance. Ginpasar sang SP ang Resolution nga naga-confirm sang MOA sang Pebrero 24, 2015 apang makaligad ang tatlo ka adlaw, nagpadala sang urgent letter si Mabilog sa SP nga isuspender ang MOA bangud sang technical issues. Nagsulat naman ang 3L proprietor nga si Leny Garcia kay Mabilog kag nagtanyag nga ma-isol sa MOA.

Abril 23, 2015 sang nagfile si Journalist Manuel Mejorada sang complaint affidavit batuk kay Mabilog bangud wala suno sa iya nag-agi sa competitive process ang pagsulod sa MOA kag gin-akusaran si Garcia nga dummy. Setyembre 8, 2015 sang nagfile si Councilor Plaridel Nava sang Affidavit-Complaint/Supplemental Affidavit batuk kay Mabilog sa diin iya gin-akusaran ang anay alkalde nga amo ang nagapanag-iya sang 3L. Ginpabutyag pa ni Nava nga gin-employ ni Mabilog ang iya serbisyo agud matuman ang iya gintawag illegitimate, immoral, dishonest kag underground acts kag mga transaksyon upod sa mga pribado nga grupo kag corporate personalities nga luyag magnegosyo sa syudad. Ginconsolidate sang Ombudsman ang complaint ni Mejorada kag supplemental affidavit ni Nava. Setyembre 2017 sang ginmandu sang Ombusman ang pagfile sang graft charge kay Mabilog bangud sa ma-anomaliya nga towing deal.

Oktubre 23, 2017 sang ginpirmahan ni Julius Matibag, Graft Investigation and Prosecution Officer III ang dismissal order batuk kay Mabilog kag gin-aprubahan ni Ombudsman Morales sang Disyembre 22, 2017. Nabutang man sa dispositive portion ang pagmandu sa Field Investigation Office, Office of the Ombudsman-Visayas nga maghimo sang fact-finding investigation batuk kay Nava sa posible administrative case batuk sa iya.

Sang Oktubre, 2017 man ginserbe ang dismissal order kay Mabilog bangud sa ginpahayag unexplained wealth. (AGB)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply