Guimbal, Iloilo — Nagreklamo ang pamilya sang 24-anyos nga iloy nga nagbata sa Rep. Pedro Trono District Hospital sa Guimbal nga ginpabay-an kag wala gin-atender sang maayo ang ila pasyente rason napatay. Suno kay Mrs. Oliva, iloy sang pasyente nga si alyas Jennyvive sang Oton, Enero 3 sang nagpacheck sila sa ultrasound result ni Jennyvive sa amu nga ospital. Ginpahayag ni certain Dr. Bullas suno kay Oliva nga delikado ang kondisyon nanday Jennyvive kag sang iya lapsag bangud nagaburambod na ang placenta sa li-og sang lapsag. Nag-abiso ang doktor nga kinahanglan i-admit sa ospital si Jennyvive kag ginsunod naman sang pamilya. Suno kay Oliva, ginabanta 2:00 P.M. sang Enero 4 sang naglupok ang puente ni Jennyvive matapos gin-induce. Nagpangayo sang bulig si Oliva sa mga nurses apang ginpahayag wala sila gilayon ginrespondehan. 2:30 P.M na sang gindala sa delivery room si Jennyvive. Ginpabutyag ni Oliva nga kinulba-an siya matapos nabati-an sa paging system sang ospital nga ginapakadto ang tanan nga doktors kag nurses sa delivery room sa pagtatap sa iya bata. Sang ginpasulod ni certain Dr. Castillo si Oliva sa delivery room, nabati-an niya nga nagahibi ang lapsag apang nagapalamuti na si Jennyvive. Napahamtang si Oliva sang ginpasalig ni Dr. Castillo nga estable na ang kondisyon sang mag-iloy. Apang nakibot sang ginhambalan siya ni Dr. Castillo nga kinahanglan itransfer sa Western Visayas Medical Center si Jennyvive bangud nagcollapse. Ginpahayag man ni Dr. Castillo suno kay Oliva nga matapos na ang iya duty takna 5:00 P.M rason wala sang maasikaso sa pasyente. Sang nagsugot si Oliva nga itransfer ang iya bata sa WVMC, ginpahayag sang personnel sang ospital nga dapat bayaran nila anay ang ila billing kag Php 500 nga bayad sa ambulansiya. Dugang diri, kinahanglan man uli-an sang pamilya ang mga units sang dugo nga nagamit. Ginpahayag ni Oliva nga nagkalakakas ang dextrose kag cateter ni Jennyvive sang gindala sa WVMC samtang ginabyahe sa ambulansiya. Gilayon nga gintatap sang mga personnel sa WVMC ang pasyente suno kay Oliva apang napatay. Ginpahayag naman sang personnel nga nahubsan sang dugo si Jennyvive sang gindala sa ospital. Nakita man sa kinatawo sang pasyente ang mga lampin kag bayo pambata nga una ginhulam sang mga personnel sa ospital sa Guimbal nga puno sang dugo. (JoMaque)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply