Opening Salvo sang 50th Dinagyang Festival, gindugukan
Iloilo City–Gindugukan ang Opening Salvo sang 50th Dinagyang Festival kaina sang hapon. Ginpangunahan sang mga opisyal sang Iloilo Dinagyang Foundation Incorporated sa pagpamuno ni chairman Ramon Cua Locson kag City officials sa pagpamuno ni Mayor Joe Espinosa ang malip-ut nga programa sa Freedom Grandstand antes ang performance sang 10 ka tribu nga mapasakup sa Ati Tribes Competition sa Enero 28.
Sa iya mensahe, ginpahayag ni Espinosa nga madamo sang aktibidad ang balantayan sa golden anniversary sang Dinagyang. Iya man ginpasalamatan ang tanan nga nagbulig sa public kag private sektor agud mangin madinalag-on ang kahiwatan.
Ginsiraduhan ang mga dalan nga ginlabayan sang parada sa lima ka judging areas kadungan sang performance sang mga tribu. Ginhatagan man sang lima ka minutos ang kada tribu agud magpakita sang choreographed dance. Ang mga tribu nga mapasakup sa Ati Tribes Competition amo ang SALOGNON sang Jaro National High School; PAGHIDAET sang Lapaz National High School; OBREROS sang Bo. Obrero National High School; ILONGANON sang Jalandoni National High School; DAGATNON sang Ramon Avanceña National High School; PANAYANON sang Iloilo City National High School; BUNTATALANIT sang Tiu Cho Teg Ana Ros Foundation Integrated School; PAN-AY sang Fort San Pedro National High School; AMIHAN sang Mandurriao National High School kag ang bag-uhanon nga Tribu TAPAZNON halin sa Capiz. (AGB)