(UPDATE) Suspek sa pagtiro patay sa empleyada sang Sara LGU, nag-ako sa iya ginhimo nga krimen

Iloilo City–Gin-ako ni Edmar Camangyan, 24-anyos sang Preciosa, Sara, nga siya ang nagtiro patay kay Mae Luzuriaga, 53-anyos nga empleyada sang Sara Local Government Unit sang nagligad nga semana.

Ginsaysay ni Camangyan nga napilitan siya nga himuon ang sugo sa iya ni PO2 Keven Piosca matapos siya sini ginbanggaan sang Enero 9 kag ginpahug nga patyon ang iya manghod. Nagatrabaho ang manghod ni Camangyan sa tyangge ni Ramona Magbanua nga una na nagpahayag nga ginpahug man ni PO2 Piosca kon manugid nga naghulam ang pulis sang kwarta sa biktima.

Ginpahayag ni Camangyan nga ginmanduan siya ni Piosca nga makigkita kay alyas Toto sa plaza sang mga alas-3 sang hapon sang Enero 11. Si Toto suno kay Camangyan ang naghatag sa iya sang slingbag nga may pusil sa sulod kag kaupod niya nga nagsunod kay Luzuriaga pakadto sa Concepcion. Suno pa kay Camangyan, si Magbanua nga kaupod ni Luzuriaga ang iya ka-text gani nabal-an ang lokasyon sang biktima sa kalan-an sa Poblacion, Concepcion.

Si Camangyan suno kay Chief Inspector Abner Jordan, hepe sang Concepcion Police Station, ang involved sa duha ka counts sang carnapping kag nakaagi preso sa Sara Police Station sa diin duty jailer si PO2 Piosca. (AGB)