Isyu sa pagbutang sang mga kiosko sa guwa sang Jaro Plaza, posible ipalab-ut sa Office of the Ombudsman

Iloilo City–Plano nanday Councilors Joshua Alim kag Plaridel Nava nga idangup sa Office of the Ombudsman ang isyu sang pagbutang sang mga kiosko sa guwa sang Jaro Plaza.

Kasunod ini sang pagbasura sang City Council sang ginduso nga resolution nga nagarequest sa DPWH nga i-demolish ang mga kiosko.

Suno kay Alim,  nahangpan niya ang sentimiento sang ni City District Engr. Rodney Gustilo matapos ginpanindugan ni Mayor Joe Espinosa nga may legal nga basehan ang gin-issue sini nga executive order nga nagapahanugot sang mga kiosko sa national road.

Kon indi masolbar ang problema suno sa konsehal, mabalik man ini gihapon sa pala-abuton pa nga tinuig sang Jaro Fiesta gani kinahanglan na madesisyunan subong.

Bisan matapos pa ang Jaro Fiesta, ginpasiguro ni Alim nga padayunon gihapon nila ni Nava ang kaso sa tuyo nga mauntat na ang pagpanguwarta suno sa iya sang pila ka mga kapitan.

May posibilidad nga matabu man ini sa iban nga plaza kon indi madesisyunan sang korte ang problema suno kay Alim. (AGB)