Iloilo City — Ginhatagan sang 72 oras ang apat ka empleyado sang City Government nga ginpapanaugan sang show cause order agud magsabat kon ngaa indi sila pagdisiplinahon angut sa ginpahayag anomaliya sa hatagay sang mga manok sa pila ka 4Ps beneficiaries sang syudad.  Gin-isyu ang show cause order sang Enero 22 kag ginpangayuan sang written explanation sanday General Services Office Head Joren Sartorio, City Agriculturist Romulo Pangantihon, Supplier Officer Eduardo M. Vargas kag City Veterinarian Tomas Forteza Jr. Isa sa apat ka rekomendasyon sang ad hoc committee nga gintukod ni Mayor Joe Espinosa agud mag-imbestigar sa mga reklamo amo ang pag-isyu sang show cause order agud ma-imbestigaran kon mapasakaan sang kaso nga gross neglect of duty sanday Pangantihon, Sartorio kag Vargas kag simple neglect of duty kay Forteza.

Ginrekomendar man ang pagreject sang una nga deliveries sang Foodwealth Agro-Vet Trading; pagrequire sa supplier nga ideliver ang nabilin nga mga manok apang dapat nga nagasunod na sa terms of reference kag indi pagbayad sa Foodwealth sa una nga deliveries.

Temporaryo nga ginpa-untat ang delivery sang nagligad nga tuig bangud sang mga reklamo nga wala nasunod ang ratio kag kabug-aton sang mga manok base sa terms of reference. Ang livestock component, kabahin sang Integrated Community Food Production Program sang City Agriculture Office nga ginpondohan sang National Anti-Poverty Commission. (JoMaque)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply