Leganes, Iloilo — Preso ang 25-anyos nga mekaniko sa Leganes matapos ginreklamo nga nagpanghimulos sa 24-anyos nga single-mom. Suno kay PO3 Jocelyn Salmon sang Leganes Police Station – Women and Children’s Protection Desk, ginhagad ang biktima nga si alyas Inday sang iya abyan nga lalaki nga mag-inom inom sang sabado sang gab-i, Pebrero 3, sa isa ka shop sa banwa. Nagpasugot si Inday sa hingyo sang iya abyan apang nakibot nga may upod pa gid sila nga apat ka mga lalaki nga indi niya kilala. Pasado las 11 na sang Sabado sang gab-i sang ginpahayag nagsulod sa kubo malapit sa shop si Inday bangud sa kahulugbon. Nakibot ang biktima sang nagsulod man sa kubo ang suspect nga si alyas Toto kag ginpahayag ginhimuslan siya. Wala nakapangayo sang tabang si Inday bangud wala siya sang ikasarang batuk sa suspect kag magahod man ang lugar sang natabu ang insidente. Nasalbar si Inday matapos nag-abot sa kubo ang iya abyan nga gilayon nga nagsapupo sa iya. Madasig naman nga nagpalagyo ang suspect apang nadakpan sa follow-up operation. Napasaka na ang kaso nga rape batuk kay Toto. Ginpahayag ni Salmon nga positibo nga may laceration sa kinatawo sang tagreklamo base sa resulta sang medical examination. May duha ka bata si Inday. Wala naman sang asawa kag kabataan si Toto. Nagpamalibad naman nga magpa-interview si Toto. (JoMaque)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply