Foreman sa Lapaz, ginlampusan sang contruction worker, patay

Iloilo City — Nasapwan nga nagahuray-ad kag patay na ang 38-anyos nga foreman sa sulod sang barracks sa Brgy. Laguda, Lapaz kahapon sang kaagahon. Ginkilala ang biktima kay Ivan Pama sang Barotac Viejo. Suno kay Rocelo Naces, 35-anyos sang Buenavista, Guimaras kag steel man sa construction company sa diin naga-obra ang biktima, las otso kagab-i sang nag-inom inom ang biktima kag ang mga upod nila sa trabaho nga kanday Ralph Francis Hechanova kag EG Bedia sa KTV Bar sa Laguda. Nag-eskandalo suno kay Naces si Bedia rason ginsaway ni Pama kag ginhambalan nga kakason na niya ini sa obra. Nagsuay kanday Bedia kag Pama apang nagtambag si Hechanova kag nagdesisyon nga maglakat na lang sila sang biktima. Ginpahayag naman ni Ariel Nandig, 38-anyos sang Buenavista, Guimaras nga ginhambalan siya ni Bedia nga patyon niya si Pama. Nadakpan sa follow up operation si Bedia kag gin-ako niya nga siya ang nakalampos sang dos por dos sa biktima. Suno kay Bedia, nagakatulog na siya sang hinali lang siya ginsulod kag ginsumbag sa guya ni Pama. Ginpahayag sang suspect nga una niya nga ginmunuhan ang biktima nga tratuhon sila sang maayo sa trabaho. Preso sa Lapaz Police Station ang suspect. (JoMaque)