Iloilo City — Ginpulihan kastigo ang duha ka menor de edad sang ginabanta 17 ka kasubong man nga menor sa Brgy. Banuyao, Lapaz. Suno sa tagreklamo nga si alyas John-John, 16-anyos sang Jaro, upod niya ang pakaisa nga si alyas Jun-Jun, 16-anyos man, sang nakigkita sa iya nobya nga si alyas Razen pasado las syete subong nga gab-i sa atubang sang Lapaz Market. Upod ni Razen suno kay John-John ang pito ka mga abyan niya nga babaye. Pag-abot sa abandonado nga hayub-hayub sa Brgy. Banuyao, nakibot ang magpakaisa sang hinali lang sila ginpulihan kastigo sang mga pamatan-on nga una nagpanago sa lugar. Ginabanta 17 tanan ang nagsapute sa magpakaisa lakip ang pito nga una upod ni Razen. May bagras kag hanog sa nagkalain lain nga parte sang lawas kanday John-John kag Jun-Jun. Nakapalagyo ang magpakaisa kag sang ginbalikan na ang lugar, wala na didto ang mga pamatan-on. Nagapati si John-John nga ginsapute sila bangud may iban nga nobyo ang iya nobya magluwas pa sa iya. Ang mga pamatan-on nga nagsapute sa ila suno kay John-John ang ka-grupo sang lain nga nobyo sang iya nobya. Kahapon lang nakilala ni John-John si Razen. May ginkustodiya naman nga menor de edad ang WCPD sa Lapaz Police Station nga ginapatihan may kaangtanan sa insidente apang ginpanginwala niya ini. (JoMaque)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply