(UPDATE) Pamilya ni Ilongga OFW Joanna Demafelis, emotional nga nagsugata sang iya bangkay

Iloilo— Wala napunggan sang mga himata ni Joanna Demafelis nga maghilibiun sang nagpauli ini sa Iloilo kaina sang aga nga nasulod na sa lungon.

Aga pa nga nagbiya sa Barangay Ferraris, Sara ang mga himata ni Joanna agud magsugat sa airport sa Cabatuan. Suksok sang mga ini ang puti nga t-shirt nga may nasulat nga “Justice for Joanna.” Bitbit man sang mga himata ang tarpaulin nga may nawong ni Joanna kag tinaga nga nagasinggitan sang hustisya para sa Ilongga OFW nga wala sang iban nga handum kundi ang makabulig sa iya pamilya.

Si Joanna ang nasapwan sa sulod sang freezer nga nagabarikutot kag may senyales nga gin-torture. Nagapanguna nga suspects sa pagpatay sa iya ang mag-asawa nga Lebanese kag Syrian nga amo sang Ilongga.

Mayo, 2014 sang nagpadulong si Joanna sa Kuwait kag 2016 sang natapos ang iya kontrata apang nawad-an na sang contact ang iya pamilya. Pebrero 9 sang gin-confirmar sang mga otoridad nga si Joanna ang nasapwan sa freezer.

Ginhapit sa Somo Funeral Homes sa Barangay Malayu-an, Ajuy ang bangkay ni Joanna kag ginpatenir sang isa ka adlaw antes isaylo sa isa pa gid ka lungon kag dal-on sa ila balay sa Sitio Cordero, Barangay Ferraris, Sara alas-2 buwas sa hapon suno sa tiya sang biktima.

“Justice for Joanna”

Ginatos naman ang nagbantay sa kilid sang dalan sa mga lugar nga nalabayan sang bangkay ni Joanna.

Labi pa nga nagtulo ang luha sang pamilya ni Joanna sa suporta kag pagkasubo nga ila nakuha halin sa mga tawo nga nagwagayway sang puti nga t-shirt kag cartolina nga may nasulat nga “Justice for Joanna” kag nagahaboy sang sinsilyo kag mga bulak samtang nagalabay ang bangkay.

Ginlaragway sang iya mga classmates si Joanna nga mabuot, matutom kag mahuluya-un ini sang naga-eskwela pa sila sa elementarya. Nagbantay sa balay sang mga Demafelis ang mga classmates kag kaabyanan ni Joanna. (AGB)