Kapalaran ni Agnes Tuballes nga nagpatigayon agud makalakat sa Kuwait si Joanna Demafelis, magadepende na sa mangin aksyon sang PNP-CIDG

Sara, Iloilo — Magadepende sa desisyon sang Criminal Investigation and Detection Group kon bala pasakaan sang kaso si Agnes Tuballes, ang Ilongga recruiter nga nagpatigayon kay Joanna Demafelis nga magtrabaho sa Kuwait.

Kasunod ini sang pahayag sang amay ni Joanna nga si Crisanto Demafelis nga indi sila interesado nga mag-file sang kaso batuk kay tuballes bangud nagbulig man lang ini sa iya bata.

Suno kay Overseas Workers Welfare Administration Chief Hans Leo Cacdac, ginakonsiderar nila ang desisyon sang pamilya Demafelis apang ang PNP-CIDG lang ang maka-determinar kon pasakaan sang kaso si Tuballes.

Trabaho man suno sa iya sang PNP CIDG nga hibaluon kon may lisensya nga mang-recruit si Tuballes.

Magluwas sa CIDG, naga-imbestigar man sa kaso ni Joanna ang National Bureau of Investigation (NBI). (JoMaque)