Mag-amay nga suspects sa pagtiro kag paglabu-patay sa duha ka lalaki sa Miagao, napasakaan na sang kaso
Miagao, Iloilo — Ginpasaka na ang double murder batuk sa mag-amay nga ginatudlo nagtiro kag naglabu patay sa duha ka lalaki sa Brgy. Indag-an, Miagao.
Suno kay Chief Inspector Norlan Perante, hepe sang Miagao Police Station, pasakaan man sang kaso nga possession of illegal firearms sanday Winsor Fabillo, 62-anyos kag mga bata sini nga sanday Marwin, 31-anyos kag Bryan, 26-anyos.
Base sa pag-autopsy sa bangkay sang mga biktima, ginpahayag ni Dr. Owen Lebaquin, medico legal officer sang Police Regional Office 6 nga napatay si Rene Morante bangud sang multiple hackwounds kag gunshot wound sa tuo nga bahin sang iya tiyan.
Ginabanta 36 tanan ang pilas sang pagkalabu sa lawas ni Morante suno kay Dr. Lebaquin.
Gunshot wound sa dughan kag fractured nga tul-an sa paa naman ang gintunaan sang kamatayon ni Fortunado Arbado Jr. alyas Abel, 35-anyos.
Nagapati si Dr. Lebaquin nga indi magnubo sa duha ang mga suspects sa krimen. (JoMaque)