Liga President kag Ex-officio City Councilor Reyland Hervias, wala sang ideya nga mapadalagan sa pagka-mayor si Cong. Jerry Treñas

Iloilo City–Wala sang ideya si Liga ng mga Barangay President kag ex-officio Councilor Reyland Hervias sa plano ni Iloilo City Cong. Jerry Treñas nga magpadalagan sa pagka-mayor sa masunod nga eleksyon.

Suno kay Hervias, natabuan nga ara siya sa Manila sang nag-anunsyar si Treñas nga ginakonsiderar sini ang magkandidato sa 2019 elections gani indi siya makatugda sa pagtipon sang masobra 170 ka punong barangay sa opisina sang kongresista. Posible suno kay Hervias nga nagapati ang mga barangay kapitan nga nagakadapat nga magbalik sa pagka-alkalde si Treñas bangud madamu ang iya nabuligan nga pumuluyo.

Nagapati si Hervias nga indi magbunggu-anay sa politika ang magbilas nga Treñas kag Mayor Joe Espinosa bangud suportado man sang madamu nga kapitan ang alkalde.

Gin-athag man sini nga wala gina-impluwensyahan sang Liga ang mga barangay kapitan kon sin-o ang ila suportahan nga kandidato sa eleksyon. (AGB)