Pavia, Iloilo–Maga-gradwar nga valedictorian sang Philippine Military Academy Alab-Tala Class 2018 ang tumandok sang Barangay Balabag, Pavia nga si Cadet 1st Class Jaywardene Hontoria.

Suno kay Hontoria, proud siya nga bata sang mangunguma kag sa pagkamatuod, siya ang right hand sang iya tatay sa pagpanguma. Ginpahayag sini nga naka-eskwela siya sa bulig sang iya tiya nga si Corazon Demaala nga amo ang breadwinner sang pamilya sang iya amay.

Ang 25-anyos nga si Hontoria, nagaserbe man nga brigade commander ukon “Baron,” ang pinakamataas nga posisyon sa ila class.

Bilang Baron, ginpahayag ni Hontoria nga ginkulbaan siya sa iya responsibilidad bangud sa iya ginasalig ang pagdisiplina sa kapareho nga kadete kag siya man ang direkta nga link sang mga kadete. Kadam-an sa mga brigade commanders suno sa iya ang wala nagapanguna sa klase bangud mabudlay nga responsibilidad kag kinahanglan ang pagbalanse sa academics kag leadership goal bilang baron.

Nag-graduate si Hontoria sang valedictorian sa Balabag Elem. School sang 2005, valedictorian sa Colegio de San Jose-Special Science Class sang 2009 kag graduate man sa nursing sang West Visayas State University sang 2013. Nakapasar man ini sa nursing board exam sang 2013 matapos ang duha ka bulan nga review. (AGB)

 

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply