Mayor Joe Espinosa, nanginwala nga ginpahalin ang mga opisyal sa City Hall nga identified kay Congressman Jerry Treñas

Iloilo City–Nanginwala si Mayor Joe Espinosa nga ginpahalin niya ang mga opisyal sa City Hall nga identified sa iya bilas nga si Congressman Jerry Treñas.

Pahayag ini ni Espinosa sa press conference kaina sang aga. Kasunod ini sang sinapol nga ginpatawag ni Mr. Jojo Castro, salaligan ni Mayor Espinosa, sang Marso 9 sang hapon.

Sa nasambit nga meeting, ginpahayag nga naghambal si Castro nga indi pwede makaserbe sang duha ka master sa pareho nga oras ang ginpatawag nga mga opisyal. Sa paghangup naman sang mga nagtambung, ginpapili sila ni Castro sa tunga nanday Espinosa kag Treñas.

Nagtambung sa sinapol sanday Executive Assistant for Barangay Affairs Boyet Rico, legislative staff Rudiver Junco, EAs Mitch Antiqueña kag Irene Ong kag ICUPAO Head Roy Firmeza.

Gin-athag naman ni Mayor Espinosa nga wala sila sang isyu ni Congressman Treñas. (AGB)