Iloilo City — Ginapa-trace na sang Information Technology head sang City Hall kon paano na-hack ang online database nila sang mga taxpayers sa syudad.

Suno kay Mr. Francis Cruz, ginatutukan nila subong ang pag-imbestigar kon paano nasulod ang ila sistema sang mga nagpakilala nga hackers.

Ang database nga nahack, naga-unod sang mga impormasyon sang taxpayers nga nagamit sang sistema pareho sang pangalan sang negosyo, address kag contact number. Ginpasiguro ni Cruz nga wala na-encode sa sistema kon pila ang ginabayaran sang taxpayer.

Sa pagbanta ni Cruz, nagalab-ut sa 100 ka taxpayers ang nakagamit sang bag-o nga sistema sa online renewal sang business permit nga gintest sang Enero subong nga tuig.

Natukiban ang ginpahayag hacking matapos ginpost sang nagpakilala nga Iloilo Blackhats sa ila Facebook page ang impormasyon tuhoy sa mga taxpayers.

Gilayon nga naghulag ang IT department sa City Hall kag nagrequest sa Facebook nga kakason ang page.

“Toto Hacker”

Nagapati ang head sang Information Technology sa City Hall nga Ilonggo ang naghack sa ila online system sa pagrenew sang business permit.

Ini kon basehan suno kay Mr. Francis Cruz ang ginpost sang nagpakilala nga “Toto Hacker” sa Facebook page nga Iloilo Blackhats. Indi na makita ang page matapos nagrequest si Cruz sa Facebook nga kakason ini matapos natukiban nga ginpost ang mga impormasyon sang mga taxpayers nga nagamit sang online system.

Sa subong suno kay Cruz, ginapa-trace niya kon paano nasulod ang sistema.  Bag-o ang online system nga gin-test sang Enero subong nga tuig kag ginabanta pa lang sa 100 ka taxpayers ang nakagamit.  Ini ang labing una suno kay Cruz nga nahack ang City Hall. (JoMaque)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply