Pavia, Iloilo–Indi gihapon makapati tubtub subong ang mga ginikanan ni 2LT Jaywardene Hontoria sa iya nalab-ot bilang valedictorian sang Philippine Military Academy Alab Tala Class 2018.

Suno sa amay nga si Mr. Oscar Hontoria, gintandaan gid ni Jaywardene ang ginhambal niya sadtu nga mas mabug-at ang mag-uyat sang arado sang sa ballpen gani dapat sini nga tutukan ang iya pagtuon.

Ginpahayag ni Oscar nga walo ka tuig sadtu si Jaywardene sang nagapanilag ini kag nagatinguha man nga makabulig sa pagpanguma pero ginapa-intiende niya sa iya bata nga mas importante nga makatapos ini sang pagtuon.

Pagkatapos sang graduation ni Jaywardene, ginhambalan sini ang iya amay nga magpahuway na sa pagpanguma apang nagbalibad si Oscar sa rason nga sa pagpanguma niya ginpadako kag ginpa-eskuwela ang iya kabataan.

Suno naman sa iloy nga si Nancy, wala gid siya sang masaway kay Jaywardene bangud magluwas nga mapisan kag matutom, indi ini pala-barkada kag wala sang bisyo.

Nagabulig suno sa iya si Jaywardene sa pagbaligya sang ila mga utanon sa iya eskuwelahan sang high school agud may yara ini sang allowance. (AGB)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply