UPDATE: Driver sang SUV nga nadalahig sa aksidente sa circumferential road sa Mandurriao kaina sang kaagahon, pasakaan sang kaso

Mandurriao, Iloilo City–Pasakaan sang kaso ang driver sang SUV nga nadalahig sa aksidente nga nagpatay sang mag-asawa sa circumferential road sa Hibao-an Norte, Mandurriao kaina sang kaagahon.

Preso sa Mandurriao Police Station si Gilbert Rey Saclauso, 39-anyos sang San Antonio, San Miguel, nga nagapangatubang sang kaso nga reckless imprudence resulting to damage to property, physical injuries and homicide. Nagbunggu-anay ang SUV kag ambulansya sang local government unit sang San Miguel pasado alas-4 kaina sang kaagahon.

Napatay ang pasyente nga mapa-dialysis kuntani nga si Ramon Sampani kag ang iya asawa nga si Rosalyn.

Padayon naman nga ginabulong sa Western Visayas Medical Center ang driver sang ambulansya nga si Efrain De Guzman nga may pilas sa ulo. Pilason man si Eddie Vera, nagatrabaho sa Iloilo Doctor’s Hospital, nga nag-upod lang sa ambulansya bangud sa amo kuntani nga ospital idul-ong ang pasyente..

Base sa imbestigasyon, nag-overtake ang SUV sa pick-up apang bangud madasig ang dalagan, naglab-utanay sila sang ambulansya. Bangud sa impact, pareho nga nagtabog ang duha ka salakyan. (AGB)