Security measures sang Phil. Coast Guard Iloilo sa pagdugok sang madamu nga tawo sa mga pantalan sa Semana Santa, plastado na

Iloilo City — Naplastar na sang Philippine Coast Guard Iloilo Station ang mga security measures para sa mga mapadulong sa Balaan Bukid sa Guimaras sa Huwebes kag Biernes Santo.

Suno kay Lieutenant Senior Grade Rodolfo Dela Peña, Coast Guard Iloilo Station Commander, naghiwat siya sang coordination meeting upod sa mga barangay officials sang Ortiz, City Proper kag mga operator sang Motor Banca associations agud mapreparahan ang pagdagsa sang mga pasahero.

Ginhingyo ni Dela Peña sa mga motor banca operators nga mabuligan sila sa head count sang mga pasahero base sa mandu sang Maritime Industry Authority ukon MARINA.

30 lang ka pasahero suno kay Dela Peña ang pinaka-safe nga head counts nga makasakay sa pumpboat.

Ginahibalo man sang coast guard ang schedule sang biyahe sang mga pumpboats kag special permit nga ginahatag sang MARINA para sa Huwebes kag Biernes Santo. (JoMaque)