Korte sa Kuwait, nagsentensya sang kamatayon sa mag-asawa angut sa pagkapatay ni Ilongga OFW Joanna Demafelis
Kuwait City – (UPDATE) Ginsentensyahan sang Kuwaiti court sang kamatayon in absentia ang Lebanese nga lalaki kag ang iya Syrian nga asawa angut sa pagkapatay ni Ilongga OFW Joanna Demafelis sang Ferraris, Sara.
Suno sa judicial source, kamatayon paagi sa pagbitay ang ginpapanaug nga sentensya sang korte apang mahimo pa maka-apelar ang mag-asawa kon makabalik sila sa Kuwait.
Ang kamatayon sang 29-anyos nga OFW nga nasapwan sa sulod sang freezer sa abandonado nga apartment, nagresulta sa pagban ni Presidente Rodrigo Duterte sang mga OFWs pakadto sa Gulf state.
Na-aresto ang mag-asawa sang Pebrero kasunod sang Interpol manhunt. Yara sa custody sang Lebanese authorities ang bana nga si Nader Essam Assaf samtang nagapabilin sa custody sa Damascus ang asawa sini. (JoMaque)