L300 van nga gincarnap sa Jaro, gingamit sang suspek sang nagpangsalisi sa Sta. Barbara antes gin-abandonar ang salakyan

Iloilo City–Gin-carnap ang L-300 van sa Jaro kagab-i Suno sa driver nga si Ryan Cariño, 32-anyos nga nagatrabaho sa Alicia’s Food Catering sa Democracia, Jaro, gin-hazard niya lang ang salakyan sa kilid sang karsada antes nagsulod sa pharmacy sa Rizal Street, Benedicto, Jaro agud magbakal sang gatas.

Nakibot na lang si Cariño sang nabalikdan nga wala na ang salakyan nga ginpark. Nadala sang suspek ang cellphone ni Cariño nga nabilin sa salakyan.

Na-recover naman ang abandonado nga L-300 van sa subdivision sa Tacas, Jaro kaina sang aga. Ginpahayag nga gingamit sang suspek ang salakyan sa pagpang-salisi sa Rizal Street, Sta. Barbara pasado alas-7 kaina sang aga.

Suno sa negosyante nga si Karen Farrol, 48-anyos nga tag-iya sang poultry supply, nataban sang suspek ang iya clutch bag nga itom nga may unod nga P10,000 nga cash.

Nagpakuno-kuno ang driver nga mabakal sang bubod kag ginlingaw sang istorya ang tag-iya antes ginkuha ang clutch bag nga nabutang sa ibabaw sang lamesa sang nagtalikod ang negosyante.

Ginlagas pa ni Farrol ang suspek kag nag-agaway sila sang bag pero wala siya sang mahimo tubtob nagsakay sa L-300 van ang suspek kag nalagyo. Suno kay Farrol, nagataas sang 5’8 tubtob 5’9 ang suspek. (AGB)