PSTMO, ginkuwestyun ang gulpi nga pag-istrikto sang SM City management sa ila security measures nga nagresulta sang pagpugok sang trapiko

Iloilo City — (UPDATE) Ginkwestyun ni Public Safety and Transportation Management Office Head Jeck Conlu ang gulpi nga pag-istrikto sang SM City management sa ila security measures nga nagresulta sa pagpugok sang trapiko sa atubang sang mall sa Diversion Road.

Gin-athag ni Conlu nga wala sang problema ang pagpatuman sang hugot nga seguridad. Apang dapat ginkonsiderar sang mall nga indi tanan nga nagalabay sa Diversion Road ang nagasulod sa ila kundi kalabanan ang may ginakadtuan nga iban nga lugar.

Indi gusto nga maghatag sang malisya si Conlu apang na-obserbahan sini ang problema matapos ginrekomendar kay Mayor Joe Espinosa ang work stoppage sa bag-o nga SM Strata building matapos nahulugan sang hook sang crane ang 16-anyos nga si alyas Sam kag nautdan sang tiil.

Ginpahayag naman ni Iloilo City Police Office Spokesperson Shella Mae Sangrines nga wala sang validated nga pamahug sa SM City ukon sa iban pa nga parte sang syudad. (JoMaque)