IPPO Headquarters, Sta. Barbara, Iloilo – Gin-confirmar ni Iloilo Police Provincial Office Director PSSUPT Marlon Tayaba nga barangay kagawad sang Barangay Dacal, San Enrique ang isa sa lima ka suspected kidnappers nga napatay sa shootout sa San Pablo City, Laguna kahapon.

Gintumod ni Tayaba si Barangay Kagawad Simplicio Parreño. Gin-ako ni Tayaba nga target pa kuntani si Parreño nga i-operate sang mga pulis bangud sa kaso angut sa illegal drugs.

Magluwas kay Parreño, ginapatihan nga taga-Iloilo man ang tatlo pa ka napatay nga sanday alyas Nono, Bot-Bot kag alyas Itik. Gina-verify pa suno kay Tayaba kon taga-diin ang mga ini.

Nadakpan naman si Ricky Barrios nga suno kay Passi City Mayor Jesry Palmares, tumandok sang Barangay Agtabo. Si Barrios suno kay Tayaba ang wanted sa kaso nga robbery, illegal possession of firearms kag illegal possession of explosive.

Abril 10, lima ka suspected kidnappers kag si PO1 Ma Zarah Jane Andal ang napatay sa natabu nga shootout. Ang mga suspects suno kay Director Glenn Dumlao, head sang PNP Anti-Kidnapping Group ang armado sang high-powered nga mga pusil. Ginpahayag nga gin-abduct sang mga ini si Ronaldo De Guzman Arguelles kag nagdemand sang P700,000 kabaylo sang kahilwayan sang biktima. Apang sa pagbayranay sang ransom sa Barangay San Nicolas, San Pablo City, Laguna, natiktikan sang mga suspek ang mga pulis gani nga ila gintiro kag natabu ang shootout.

AWOL

Absent Without Official Leave ukon AWOL ang status ni Mr. Simplicio Parreño nga isa sa lima ka mga ginapatihan kidnappers nga napatay sa shootout sa San Pablo City, Laguna kahapon suno sa barangay kapitan sang Brgy. Dacal, San Enrique.

Suno kay Mr. Ariel Lasap, barangay kapitan sang Dacal, nagdaug bilang brgy. kagawad sang 2013 brgy. elections ang tricycle driver nga si Parreño. Nagpangalagad sang masobra isa ka tuig si Parreño suno kay Lasap tubtob nga nangindulaan sa ila barangay sugod sang 2014.

Nakibot ang mga brgy. officials sang Dacal suno sa brgy. kapitan bangud hinali lang nga wala nagtambong sa ila session si Parreño. Nagkonsulta sa Department of Interior and Local Government ukon DILG ang mga brgy. officials kag nadesisyunan nga ideklarar AWOL si Parreño.

Ginpahayag ni Lasap nga wala sang kaangtanan sa illegal nga druga si Parreño sang nagapuyo pa siya sa ila barangay. Dugang niya, wala man siya sang may nabaton nga impormasyon nga miembro si Parreño sang organized crime group.

Nakabalo na ang ginikanan ni Parreño sa Brgy. Dacal angut sa natabo sa iya. Gina-asikaso naman sang pamilya Parreño sa Manila ang bangkay ni Simplicio agud madala sa San Enrique suno kay Lasap. (JoMaque)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply