(UPDATE) Pulis nga gintudlo kahimbon sang kidnap-for-ransom group nga nadalahig sa Laguna shootout, taga-Passi City

Passi City, Iloilo–Ginconfirmar ni Salngan Punong Barangay Jose Rolly Lacxa nga tumandok sang ila barangay si SPO2 Leo Pamonag, gintudlo supplier sang uniporme, armas kag bala sang ginpahayag Barrios kidnap-for-ransom syndicate nga naka-engkwentro sang mga pulis sa San Pablo City, Laguna sang Abril 10.

Nakibot si Lacxa sang nabalitaan nga nadalahig si SPO2 Pamonag sa  natabu bangud sa iya pagkakilala, maayo ang pamilya sang pulis.

Suno kay Laxca, wala man siya sang nahibaluan nga nangin kabahin sang sindikadato si Pamonag.

Ang asawa ni Pamonag suno kay Lacxa, pulis man nga assign sa Quezon City kag may mga paryente man sila nga nagatrabaho sa PNP.

Yara sa kustodiya sang PNP Anti-Kidnapping Group sa Camp Crame si SPO2 Pamonag matapos na-establisar nga kahimbon sang mga nagkidnap sa ginpahayag drug personality nga si Ronaldo Arguilles.

Ginpahayag ni Quezon Police Provincial Office PIO Marcelito Platino nga na-assign si SPO2 Pamonag sa Regional Operation and Plans Division sang Police Regional Office 4A.

Nagaguwa sa imbestigasyon nga agaway sa teritoryo nga ginabagsakan sang illegal nga druga ang motibo sa pagkidnap kay Arguilles suno kay Platino.

Duha sa lima ka napatay ang na-identify nga taga-Iloilo nga sanday Simplicio Parreño, AWOL barangay kagawad sang Dacal, San Enrique, kag Jerson Palmares, 21-anyos sang Agtabo, Passi City. (AGB)