PRO 6, nagpasalig nga himuon ang tanan agud malikawan ang kalakasan kag kinagamo sa Barangay kag SK elections
Iloilo City — Ginpasalig sang Police Regional Office 6 nga himuon sang pulis ang tanan agud malikawan ang mga kalakasan kag kinagamo sa Barangay kag Sangguniang Kabataan elections.
Gin-ako ni Chief Inspector Joem Malong, spokesperson sang PRO 6 nga daku nga panghangkat sa mga pulis ang pagsustiner sang kalinong kag katawhay sa election period.
Nangin minimal ang narecord nga insidente sang PRO 6 sa pagsugod sang election period sang Sabado.
Nagapasalamat si Malong sa publiko nga nagakooperar sa pulis agud masiguro nga mangin matawhay ang election period tubtub nga matapos sa Mayo 21.
Nagapati siya nga nakahangup na ang publiko sa ginapatuman nga checkpoints kag iban pa nga pagsulundan.
Sa una nga adlaw sang election period, duha ang narecord nga nadakpan. Una ang lalaki sa Cadiz City, Negros Occidental nga nakuhaan sang pusil kag nagasoksok sang police athletic uniform.
Gin-aresto man ang ginpahayag hubog nga menor de edad sa Lambunao matapos nabungguan sang iya ginamaneho nga motorsiklo ang checkpoint signage. (JoMaque)