(UPDATE) Work stoppage sa SM Strata, ginmandu sang City Engineer’s Office

Iloilo City–Nagpaguwa sang work stoppage order ang City Engineer’s Office sa SM Strata bangud sang mga insidente, pinakaulihi ang pagkahulog sang glass panel sa duha ka nagalabay nga salakyan sa service road sa kilid sang building sang Sabado.

Sa order nga pirmado ni City Engineer Bobby Divinagracia nga napirmahan Abril 17, 2018, ginmanduan ang tag-iya sang SM Strata nga SM Prime Holdings nga untatan ang mga obra sa building samtang wala naresolbar ang isyu sa safety.

Suno kay Engr. Jose Cloyd Grecia sang Structural Section sang City Engineer’s Office, indi na aksidente ang pagkahulog sang glass panel sang Sabado bangud natabu ini pila ka adlaw lang matapos nahulugan sang lifting hook sang crane kag nautdan sang tuo nga tiil ang 16 anyos nga lalaki sang Marso 31.

Ginpahayag ni Grecia nga may kapabayaan na ang contractor gani ginmandu ang work stoppage. (AGB)