Aklan — Istrikto ang pagpatuman sang seguridad sa Boracay agud mapabilin ang kalinong kag katawhay sa anum ka bulan nga rehabilitasyon nga magasugod sa Abril 26.

Suno kay Police Regional Office VI Director Cesar Hawthorne Binag, katuyuan sang 630 ka gindeploy nga mga pulis, soldado kag Coast Guard personnel nga masiguro nga wala sang gamo nga matabu agud mas madasig ang rehabilitasyon.

Kon wala sang magsinamok suno kay Binag kag madasig ang pag-obra, posible liwat nga buksan sa mga turista ang Boracay antes pa ang anum ka bulan.

May himuon nga walk through sa mga katapo sang media buwas agud ipakita ang set up sang ID system.

Ginsulit ni Binag nga kilalahon ang tanan nga ID nga gin-isyu sa mga barangay kag workers nga may address sa Boracay.

Hatagan man sang ID ang mga government employees nga mabulig sa rehabilitasyon.

Ang DOT naman ang maga-aprubar sa media ID. Samtang ang indi sakup sang ID system, mahimo maka-apply sa security committee nga nakaplastar sa Jetty Port sa Caticlan agud mahatagan sang temporary pass sa pagsulod sa isla.

(ATT)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply