Councilor Plaridel Nava, disappointed sa opinion sang City Legal Office sa isyu batuk sa PECO

Iloilo City–Dismayado si Councilor Plaridel Nava sa legal opinion sang City Legal Office nga indi ini makarepresentar sa mga konsumedor  nga may reklamo batuk sa Panay Electric Company (PECO).

Nagapakita lang suno kay Nava nga indi gusto sang mga taga-City Legal Office nga ma-involve sa kaso kag luyag lang nila nga magpatawhay sa sulod sang opisina. Suno kay Nava, nagapangita lang sang rason ang mga city legal officers agud makalikaw sa ila obligasyon.

Kon basehan suno sa iya ang Local Government Code, may responsibilidad ang City Legal Office nga magbulig sa city government, sa mga empleyado ukon sa pangkabilugan kon may interest nga involved ang gobierno.

Ginpa-athag sang konsehal nga agrabyado sa kaso ang mga konsumedor gani nagdangup sila sa city council nga amu naman ang nagtulod sa konseho agud mag-imbestigar.

Ginhingyo sang City Council ang legal opinion sang City Legal Office kon puwede mapasakaan sang kaso nga large scale estafa ang PECO kasunod sang mga reklamo sang mga konsumedor. (AGB)