Kuwaiti government, nagtanyag nga dal-on sa Lebanon kag Syria ang pamilya ni Ilongga Joanna Ddemafelis agud magsaksi sa trial sang mag-asawa nga suspek sa brutal nga pagpatay sa OFW

Manila— Nagtanyag ang Kuwaiti government nga buligan ang pamilya sang ginpatay nga Ilongga OFW nga si Joanna Demafelis sang Sara nga makakadto sa Lebanon kag Syria agud magwitness sa trial sang kaso sang mag-asawa nga suspek sa krimen.

Suno kay Labor Secretary Silvestre Bello III, nagtanyag ang Kuwaiti government matapos nagbalibad ang Lebanese kag Syrian governments sa request nga i-extradite pa-Kuwait ang mga suspek nga amo ni Joanna. Plano suno kay Bello sang Lebanese kag Syrian governments nga magconduct sang trial para kanday Lebanese Nader Essam Assaf kag Syrian Mona Hassoun  angut sa pagpatay kay Joanna nga nasapwan sa freezer sa abandonado nga apartment sang Pebrero.

Ginpahayag ni Bello nga abagahon sang Philippine government ang gasto kon masaksi sa trial ang pamilya ni Joanna. Mahatag man suno sa iya sang abogado ang gobyerno kon kinahanglan.

Sang Abril lang, nagpabutyag ang pamilya Demafelis nga luyag nila makita ang mag-asawa kag nagalaum nga mapatuman ang silut nga kamatayon sa ila. (AGB)