Pamilya sang ginpatay nga Ilongga ofw nga si Joanna Demafelis, ginpatawag sang OWWA agud istoryahan ang pagtambung sa trial sang mag-asawa nga suspek sa Lebanon kag Syria
Ginpatawag sang Overseas Workers Welfare Administration ukon OWWA ang pamilya sang ginpatay nga Ilongga OFW nga si Joanna Demafelis agud istoryahan kun sin-o nga miembro sang pamilya ang matambong sa trial sa kaso sang mag-asawa nga amo ni Joanna.
Kasunod ini sang tanyag sang Kuwaiti government nga abagahon ang gasto sa pagtambong sang pamilya Demafelis sa trial sa Syria kag Lebanon.
Suno kay Jojit Demafelis, magulang ni Joanna, upod sila sang iya ginikanan nga matambong sa trial. Apang wala pa na-finalize ang schedule sang ila biyahe bangud sang Ramadan.
Magluwas sa Kuwaiti government, mabulig man sa gasto ang gobierno kag mahatag sang abogado kon kinahanglan para sa pamilya Demafelis. (AGB)