Iloilo City–Plano ni Councilor Plaridel Nava nga pasakaan sang kaso si Congressman Jerry Treñas may kaangtanan sa ginpahayag nga pag-impluwensya sang kongresista sa Sangguniang Kabataan federation election.

Iga-file ni Nava ang kaso sa pagbalik niya halin sa New York sa Hunyo.

Nagalaum si Nava nga magakooperar ang iya mga testigo samtang himuon niya nga ebidensya ang ginpadala sa iya nga audio clip ni Treñas nga ginpahayag nagapangampanya para sa iya kandidato sa SK federation election.

Suno kay Nava, ilakip niya man ang text messages sang mga tinawo sang kongresista nga nagapangayo sang bulig sa mga barangay kapitan nga tipunon ang mga SK officials kag ang ginpahayag sample ballot nga ginpanagtag sang kongresista nga naga-unod sang isa ka libo ka pesos para sa mga SK officials. Gintumod sang konsehal sanday former Executive Assistant for Barangay Affairs Boyet Rico, former Iloilo City Urban Poor Affairs Office ukon ICUPAO head Roy Firmeza, Liga President Reyland Hervias kag Butch Panaguiton.

Preparado naman si Treñas sa iga-file nga kaso. Suno kay Treñas, usisaon niya kag pamatian kon iya gid man tingog ang ginpabati ni Nava sa city council kahapon nga ginpahayag nagapangampanya sa iya kandidato sa isa ka SK gathering.

Indi na madumduman ni Treñas ang natabu sa gathering apang nadumduman niya nga nakatambong siya sa pagtililipon ni President Roxas, City Proper Punong Barangay Irene Ong. Suno pa kay Treñas, indi niya kilala ang mga nagpadalagan sa SK federation election.

Ginpanghiwala sang kongresista nga nakapadala siya sang text messages sa sin-o man angut sa SK gathering pareho sang gina-claim ni Nava. (AGB)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply