Iloilo City–Ginpahalin sang operator sang Ma-Belle Taxi ang iya driver nga ginreklamo sang 33 anyos ng babaye nga pasahero nga nagbiglang-liko sa iya sa lodging house sa Molo kahapon.

Ginconfirmar ni Mr. Val Casipong nga iya unit ang may body number 1436 nga ginmaneho ni Archie Evangelista, ginabanta 33 tubtob 35 anyos sang Capiz. Gindala ni Casipong si Evangelista sa Molo Police Station kag ginhingyo ang mga pulis nga ipatawag ang tagreklamo nga si alyas Kris sang San Juan, Molo agud ma-istorya. Nag-ako ang driver suno kay Casipong nga ginsulod niya sa Sofia Lodging House ang unit apang ginrason nga ginhimo ini bangud indi siya makadiretso sa Calumpang area dala sang pagpugok sang trapiko.

Nagsorry si Casipong bangud sa ginhimo sang iya driver kag nag-athag nga wala niya ginatolerar ang indi ensakto nga buluhaton. Nagsorry man suno sa iya si Evangelista apang nagdesisyon ang operator nga pahalinon ang driver agud indi madalahig ang iban nga taxi drivers.

Gin-ako ni Casipong nga nakibot siya bangud mabuot kag nagasunod sa mga polisa sang kompaniya si Evangelista nga duha ka tuig na nga nagamaneho sa iya. Kumpiyansa naman si Casipong nga indi ma-apektuhan ang iya negosyo bangud gilayon niya gin-aksyonan ang reklamo.

Ginsaysay naman ni alyas Kris nga nagsakay siya sa Western Visayas Medical Center kag nagpadul-ong pauli agud makapahuway bangud duha ka adlaw na siya nga wala nakatulog sa pagbantay sa iya hinablos nga nagbata. Naglapaw suno sa iya ang taxi sa alagyan pakadto sa ila gani nagbalik ang driver apang nakibot siya sang nagsulod sa sila sa lodging house.

Naguwa si Kris kag nagpangayo sang bulig sa room boy agud makasakay siya sa jeep kag nagpablotter sa police station.

Ginbuyagyag ni Kris nga antes nagliko sa lodging house, ginhikap pa sang driver ang iya buhok kag guya. (AGB)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply