Iloilo City–Gindetalye sa Aksyon Radyo Iloilo sang mag-iloy nga Melba kag Boy sang Dungon C, Mandurriao ang ginpahayag pagkastigo kag pagbuyayaw sa ila sang kapitan sang Block 22.

Suno sa iloy nga si Melba, Mayo 31 sang gab-i sang natabu ang pagkastigo sa iya anak. Nagahampang sang basketball sa court sa Block 22 si Boy, 16-anyos upod ang iya mga abyan nga taga-Housing sang ginpa-untat sila ni Punong Barangay Ray Rico bangud wala nakalisensiya.

Nag-untat man sang hampang ang grupo ni Boy pero ginpahayag nga ginsugo sang kapitan ang mga bata-bata sini nga kastiguhon ang menor. Gindala pa gid si Boy sa barangay hall sa diin naman siya ginlampusan sang kapitan sang bottled water nga may unod pa nga tubig.

Naabtan pa ni Melba nga ginabuyayaw sang kapitan ang anak kabangdanan nag-react man ini. Ginpahayag ni Melba nga ipa-aresto pa kuntani siya sang kapitan sa police.

Desidido ang mag-iloy nga kasuhan ang kapitan.

‘Indi matuod’

Ginpanginwala naman ni Rico ang alegasyon batuk sa iya.

Suno kay Rico, sang nagligad nga gab-i, nagkadto sa court sang barangay si Alyas Boy. Ginsaway niya ini bangud wala nakalisensya.

May schedule kuntani nga hampang sa gym apang wala nag abot ang nagpa schedule bangud nag ulan.

Sang ginsaway niya si alyas Boy kaupod ang ginabanta pito pa ka kabataan, ginsabat pa siya sini sang binastos nga “imo na di?” kag nagakumod pa.

Ginhambalan niya ang menor nga iya ini sang barangay kag indi na magbalik pa.

Apang pagkasunod nga adlaw, nagbalik si alyas Boy kaupod ang pila pa sa mga kabataan kag ginpahalin ang mga nagahampang sa court nga residente sang iya barangay.

Nagreklamo ang mga kabataan sa iya, rason nga ginsaway niya liwat; apang ginsinggitan siya sini kag ginsabat pa.

Sang nagtalikod si Rico, nagtapungulay si alyas Boy kag duha pa ka menor nga residente sang iya barangay.

Ginsaway ni Rico ang mga kabataan kag gindala sa barangay si alyas Boy.

Sang ginpamangkot si alyas Boy, suno kay Rico, nagbinutig pa ini bangud ginhambal sini nga wala na ini sang ginikanan kag 19 anyos na apang sa pagkamatuod, 16 anyos pa lang kag may ginikanan pa.

Ginpanginwala man niya nga ginlampusan niya sang bottled water ang menor. Suno sa iya, “ginpitik” niya lang ini sang bottled water.

Nag abot si alyas Melba nga iloy sang bata kag ginpahayag nga nagpanggamo pa gid samtang nalagyo sang ulihi si Boy.

Wala sang plano nga magpasaka sang kaso nga alarm and scandal si Rico sa iloy sang bata kag nagdesisyon nga pabay-an na lang. (AGB)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply