PSTMO, nagtumod sang mga subdivisions kag malls nga posible mangin alternatibo nga ruta sang mga salakyan sa pagbukas sang klase

Iloilo City — Nag-identify ang Public Safety and Transportation Management Office sang mga subdivisions kag malls nga posible mangin alternatibo nga ruta sang mga salakyan sa pagbukas sang klase.

Suno kay PSTMO Head Jeck Conlu, makigsapol siya upod kay Councilor R. Leone Gerochi nga chairman sang Committee on Transportation sa City Council, sa mga homeowners kag mall owners sa Lunes agud magpangayo sang permiso. Kon magpasugot ang mga ini, mahimo nga mapatuman ang plano sa Martes.

Kabahin man sang preparasyon sang PSTMO para sa pagbukas sang school year 2018-2019 ang pagkanselar sang leave sang mga traffic aides subong nga bulan agud may nagakaigo nga tawo nga magaderiher sang trapiko ilabe na sa mga dalanon nga malapit sa mga eskwelahan. Magabulig man sa TMTRO suno kay Conlu ang mga taga-Special Services Unit ukon SSU. (JoMaque)