Menor de edad, patay matapos ginapatihan naghikog
Dumangas, Iloilo — Nasapwan nga nagahapa sa lamesa sang kusina kag may higot sa liog ang 15-anyos nga helper sa Brgy. PD Monfort North alas 4:30 kaina sang kaagahon.
Suno kay PO2 Josebel Doromal, imbestigador sang Dumangas Municipal Police Station, nagahimos ang mga amo ni alyas Mark agud magkadtu kuntani sa banwa para magdeliver sang ice sang nasapwan ang solterito.
Gindala pa sa ospital si Mark apang gindeklarar nga napatay.
Posible suno kay PO2 Doromal nga nagbitay si Mark paagi sa pagtongtong sa lamesa kag naglukso.
Wala man sang may nakita nga pilas sa lawas ni Mark.
Pito pa lang ka bulan nga nagatrabaho bilang helper si Mark nga tumandok sang Brgy. Panuran, Janiuay.
Ginpahayag ni PO2 Doromal nga mahipuson nga bata si Mark, wala man ini sang barkada, wala sang nobya kag wala man sang kontra. Ginapatihan ni Doromal nga depression ang rason sang ginpahayag paghikog ni Mark.
Nag-request na sang autopsy ang pamilya sang menor de edad agud matumod kon bala may foul play sa iya kamatayon suno kay PO2 Doromal. (JoMaque)