15-Anyos Nga Dalagita Sa Syudad, Nagreklamo Nga Gin-Gang Rape; Nagpakilala Nobyo Sang Tagreklamo, Lakip Sa 5 Ka Mga Suspetsado

Iloilo City — Nagreklamo ang 15 anyos nga babaye nga gin-gang rape sang indi magnubo sa lima ka lalaki sa isa ka barangay sa syudad.

Suno kay SPO3 Debbie Yocogco sang Police Station 1, natukiban sang tagreklamo ang natabu sang nakabugtaw siya kahapon sa isa ka balay nga hublas na. May mga litrato man nga ginpadala sa iya Messenger account sa diin makita ang dalaga nga hublas kag may lain-lain nga lalaki sa iya ibabaw.

Sa panaysayon sang tagreklamo suno kay SPO3 Yocogco, nahubog siya sa birthday party sang Mierkules sang gab-i. Ginabanta sa 15 ang kaupod sini nga nag-upod upod man ang babaye nga pakaisa sang tagreklamo. Apang sang nahubog na, ginpahayag nga gintuwangan ang 15 anyos sang indi magnubo sa lima ka lalaki kag gindala sa ibabaw sang balay.

Ginpangita ang tagreklamo sang iya ginikanan kahapon sang aga kag nagpangayo sang bulig sa mga pulis gani nadakpan ang duha ka 17 anyos kag duha ka 18 anyos samtang nakapalagyo ang isa ka 19 anyos. Gindala sa Balay Dalayunan ang mga menor-de-edad nga suspek samtang preso sa Police Station 1 ang duha pa. Isa sa mga suspek ang gintudlo nga nobyo sang tagreklamo.

Nagpa-idalum na sa medical exam ang 15 anyos agud mahibaluan kon ginrape siya kag mapasakaan sang kaso ang mga suspetsado.

(att)