(UPDATE) 15 anyos nga babaye, desidido magpasaka sang kaso batuk sa lima ka lalaki lakip ang iya nobyo bangud sa ginpahayag pag-gang rape sa iya

Iloilo City–Desidido nga magpasaka sang kaso ang 15 anyos nga dalaga batuk sa lima ka lalaki nga iya ginreklamo nga nag-gang rape sa iya sa isa ka barangay sa syudad kahapon sang kaagahon.

Ginconfirmar ini ni SPO3 Debbie Yocogco sang Women and Children’s Protection Desk sang police Station 1. Suno kay Yocogco, nagtinudlu-anay ang mga arestado nga duha ka 17 anyos kag duha ka 18 anyos kon sin-o ang involved sa natabu.

Nagapabilin nga at-large ang 19 anyos nga celebrator sang birthday party nga gintambungan sang tagreklamo kag iban pa nga suspetsado.

Una na ginsaysay sang 15 anyos nga nakabugtaw siya kahapon sang aga nga hublas kag may nag-upload sa group chat sa Messenger sang mga litrato sini nga wala sang bayo kag may lain-lain nga lalaki sa iya ibabaw. Suno kay Yocogco, posible ginapabugal pa sang nag-upload sang mga litrato ang ginhimo sa tagreklamo.

‘Naghinulsol’

Naghinulsol naman si alyas John-John, isa sa apat nga nadakpan nga ginpahulam pa ang iya shorts sa tagreklamo. Suno kay John-John, ginpahulam niya ang shorts sa 15 anyos bangud nga nagahublas na ini sang sobra nga kahulugbon.

Ang nobyo man lang sang 15 anyos nga babaye ang naghimulos sa iya suno kay John-John. Gin-ako ni John-John nga naka-upod siya sang gindala ang 15 anyos sang iya 17 anyos nga nobyo sa ila balay apang ginpanindugan nga naguwa man siya matapos nga ginpasuksok sa tagreklamo ang iya shorts. (AGB)